س- يعنى ايه ظابط متخصص؟
ج/ شخص معاه مؤهل جامعى . فى تخصص . مطلوب من القوات المسلحه . بيتم التقديم ونجاح اختبارات القبول . ودخول الكليه الحربيه 6 شهور .ويتخرج برتبه ملازم اول . ويبقى ظابط متخصص (ظابط طبيب. ظابط مهندس . ظابط محاسب وهكذا ) س - طيب اعرف منين ان تخصصى مطلوب ؟ ج/ انتظر الاعلان فى شهر 11 بينزل التخصصات المطلوب بالشروط ؟
س- طب ايه هى الشروط ؟ وهل هى ثابته ؟
ج/ شروط التقديم مش ثابته للكل . لان دفعه متخصصين مقسومة 3 دفعه اطباء . ودا تخصصات الطب المطلوبة دفعه مهندسين . تخصصات الهندسه المطلوبه دفعه مختلط. باقى التخصصات المطلوبة كل تخصص له شروطه . من حيث السن المسموح والتقدير .ودا حسب احتياج القوات المسلحه . السن لا يتعدى 26 سنه . تقدير جيد فاعلى . طول لا يقل عن 170 . متكنش اخدت اعفا طبى من الجيش . وطبعا الشروط الثابته لاى كليه عسكريه . اب وام مصريين عن غير طريق التجنس .لم يسبق فصلك من اى مدرسه او كليه عسكريه . وزى ماقولت بعض التخصصات ليها استثناء. يعنى تخصصات طب ممكن السن المسموح يبقى 30 سنه والتقدير مقبول . كذلك تخصصات معينه ف هندسه
س- طب انا طولى اقل من 170 . او انا تخصصى مطلوب جيد وانا جايب مقبول . او انا سنى معدى السن المسموح. ومعايا واسطة تقيله . هل هتعدينى ؟
ج/ لا . لو معاك مدير الكليه الحربيه. ومخل بشرط من الشروط الاساسيه دى .مش هتعدى .لان دى لايحه عسكريه وكل ملف بيتراجع الف مرة من مساعدين وزير الدفاع. وبيصدق عليه وزير الدفاع بنفسه
س- اومال الواسطة تساعدنى ف ايه ؟
ج/ هقولك الواسطة بتتحرك بعد ماتكون مستوفى الشروط الاساسيه . وممكن تلعب بقا لو عندك ملحوظة ف الطبى . مقصر ف اختبار رباضى . بس مش على طول بتنفعك فى كدا كمان . وممكن تكون الواسطة سبب انك ماتقبلش . وحصلت كتير مع ناس معاها وسايط لا تتخيلها . وخرجو طبى . او جت قفزة الثقه ماقفزش . او عنده لدغه ظاهرة . ومحدش عرف يعمله حاجه . ونصيحه اعتمد على ربك .
س.- طب بامانه كدا . هى حلوة الوظيفه دى .يعنى هرتاح فيها ؟
ج/ هقولك اجابه السؤال دى تعتمد عليك . لو انتا شخص بتتخنق من اى مجهود نفسى او بدنى زيادة . لو انتا ظروف بيتك ماتسمحش تكمل طول حياتك غايب عنهم ب ال15 يوم وال 20 يوم . لو انتا مابتحبش حاجه تتحكم فيك . نصيحه ليك ماتقدمش علشان هتتعب طول حياتك . وافهم انها وظيفه ميرى . قبل مايكون اسمك طبيب او مهندس فانتا اسمك ظابط . وطول شغلك لابس ميرى حتى لو دكتور ف مستشفى عسكريه . يجيلك تليفون ف اى وقت ماتقولش بم . الحياه العسكريه غير الحياه المدنيه نهائى بتاخد برستيج اجتماعى ومرتب . وبتدفع كتير قصادهم .انا بس بوضحلك الصورة كامله . علشان تكون كل خطوة ف حياتك عن وعى واقتناع
س- طيب انا هقدر استحمل ومقتنع وهعرف اعيش تمام . ايه الاوراق المطلوبه بقا للتقديم ؟
ج/ الصورة اللى تحت فيها الأوراق المطلوبه . واللينك دا . فيه الاوراق المطلوبة بردو . وفيه كمان اعلان سنه فاتت . علشان تشوف فالعادى التخصصات اللى بتطلب دايما ايه
- الاوراق المطلوبة كما ذكرها احد اعضاء الصفحة---
الاوراق المطلوبة هي:1-القيد العائلي للاب2-اصل شهاد التخرج3-مؤهل الاب والام4-بيان مفردات مرتب الاب والام5 -"3" صور طولية للاب والام و في المرحلة التانية:القيد العائلي لكلا الجدين
أولا :القيد العائلى للوالد:1- صورة بطاقة الرقم القومى للوالد او شهادة ميلاد الكمبيوتر فى حالة الوفاه 2- صورة بطاقة الرقم القومى للوالدة او شهادة ميلاد الكمبيوتر
3- صورة شهادة الميلاد الكومبيوتر للأبناء ( اللى هما أخواتك يعنى )
4- صورة وثيقة الزواج وفى حالة تعدد الزوجات يتم استيفاء الأوراق اللازمة لكل زوجة
5- صورة وثيقة الطلاق فى حالة وجود واقعات طلاق
6- صورة شهادة الوفاه فى حالة وجود جالات وفاه لأى أحد من أفراد الأسرة
ثانيا :القيد العائلى للجد من الطرفين (يعنى ابو باباك وابو مامتك )
1- صورة من مستند الميلاد لصاحب القيد والجد والجدة أو صورة من شهادات الوفاه اذا تعذر الحصول على شهادات الميلاد
2- صورة شهادة الميلاد للزوجة او الزوجات فى حالة وجود أكثر من زوجة
3- صورة من شهادة الميلاد لأنجال الجد (الأخوال - الخالات - الأعمام - العمات )
4- صورة من وثيقة الزواج او الطلاق واذا كان الزواج قبل عام 1962 فلا يتم طلب مستند الزواج
5- شهادة الوفاه فى حالة وجود حالات وفاه ( الأخوال - الخالات - الأعمام - العمات )
الإعلان الرسمى :
ملحوظه 1 : ليس للضباط الاحتياط اى مميزات ولا اولية وهذا مذكور فى الاعلان
ملحوظه 2: كل تخصص بيفرق فى بعض شروطه عن التخصص الاخر
س- طيب انا عرفت كل المطلوب دلوقتى . ابدا اجهز الورق دا امتى ؟
ج/ لو ضامن ان تخصصك بيتطلب دايما . اعمل القيود العاءلية دلوقتى لانها بتاخد وقت وابدا فيه من النهاردا لانك كمان ايام وهتترحل سواء جندى او هتدخل الكليه لو ظابط . وهيتسمحلك تنزل يوم واحد تسحب الملف ويوم الاختبار بس . علشان الوقت ميزنقكش باقى الورق زى الفيش وخلافه . بيطلع فى 48 ساعه بالكتير
س- طيب والدى معاهوش مؤهلات . او معندناش املاك او ايا كان. هل هسقط؟
ج/ محدش يقدر يقولك هتسقط او هتنجح . انتا ونصيبك . بس محدش هيسقطك بسبب حاجه زى دى . او بمعنى اصح مش هيفصح عن ان سبب سقوطك حاجه من دى .
س- طب الطول والوزن ؟
ج/زى ماقولنا الطول مايقلش عن 170 وبتقيس من غير شوز .والوزن أطرح 100 من طولك . يعنى طولك 170 يبقى وزنك 70 . مسموحلك 5 كيلو فوق و5 كيلو تحت . لكت الاهم هو شكل جسمك . يكون مشدود وكويس. لان ناس بتلعب جيم . زايده عالميزان لكن قوام جسمها كويس . دول عادى
س- طيب ايه اللى بيخرج ف الطبى ؟ وايه موضوع النظر؟
ج/ حاجات كتير جدا . بس اغلبهم رمد وعظام . يعنى بتدخلو 10 عيادة العظام بتلاقى 3 كملو والباقى خرج . والنظر مسموح لطب وصيدلة فقط الكشف بنظارة وبالنسبه للى عامل زايده او عنده لدغه او فيه اثار عمليات ف جسمه او ايده بتعرق او كل التفاصيل دى . الدكتور اللى بيحددها . متسمعش لحد تانى .
س-طب الرياضى عبارة عن ايه ؟
ج/ قفزة ثقه . مفيهاش رجوع . 3 ثوانى بعد الصفارة لو ماقفزتش . البس هدومك وروح . ومفيهاش درجات . قفز . او لم يقفز * جرى 1500 متر فى 6 دقايق * ضغط 40 عدة *بطن 40 عدة *عقله 10 عدات . وعقله اللى هناك عاليه . وضهر ايدك يكون ناحيه وشك . ورجلك مفرودة ومشدودة . وتطلع للاخر وتنزل للاخر * توازن . خشبه كدا عرضها 10 سم بتمشى عليها للاخر وتلف وترجع من غير ماتقع معظم اللى بيقصر رياضى بيبقى ف الجرى والعقله . غير كدا متهيالى الضغط والبطن سهلين . ولو ان فيه شباب مريحه عالاخر . اى حاجه انتا مقصر فيها اتمرن عليها من دلوقتى
س- طب انا عديت كل دا . اعمل ايه فالهيئة؟
ج/بنطلون اسمر. قميص ابيض سادة . حزام كلاسيك توكه صغيرة . جزمة كلاسيك سمرا . داخل لبسك مظبوط عليك واثق من نفسك حاطط برفان هادى جدا. واقف انتباه. بتقول . اسمك كليتك تخصصك تقديرك مجموعك فالرياضى .وارد يسالك ف تخصصك .وارد يسالك عن ماركه اى حاجه انتا لابسها . الاهم الثقه والاتزان مش الإجابات. حد هزر معاك اخرك ابتسامه خفيفه . كلامك ميرى .
س- وانا فالجيش. النتيجه بتوصلنى ازاى ؟
ج / هتوصلك ف قلب وحدتك او مركز تدريبك او كليتك لو طالب . ملكش دعوة ازاى
هل الظباط الاحتياط .ليهم اولويه فالقبول ؟
ج/ بكل بساطة . لو قصدك اولويه بمعنى . انك تكون مش مستوفى الشروط او عندك مشكله طبيه او مقصر رياضى ويعدوها علشان انتا ظابط احتياط هقولك . لا مفيش الكلام دا بتقدم زى اى حد عادى وطول الاختبارات بتتعامل كانك حد عادى جدا . ملكش اى اولويه ف اى حاجه . غير ف حاله واحدة . لما توصل هيئة وعرض عام . ودرجاتك متقاربه مع زمايلك . بياخدوك بحكم انك عشت الميرى واتعمل عنك تحريات قبل كدا ونجحت هيئة قبل كدا وفاهم عسكريه. بس خد بالك. بيسالك سلاحك ايه وممكن يقولك اعمل التحيه العسكريه . ولو انتا مقصر رياضى هيمسح بيك الارض . ويقولك ازاى ظابط فالجيش ومقصر لياقه. وحصلت كتير قبل كدا طب ليه الاعلان بيقول الاحتياط ملهمش اولويه . يقصد ملهمش استثناء ف شروط التقديم . وعلى فكرة السنه اللى فاتت تم قبول 25 ظابط احتياط من عدد 290 فالمتخصصين . ودى نسبه كويسه وكل سنه بيتم قبول نفس النسبه تقريبا . واللى كشفو سمات يوم المنصورة . الظابط اللى كان هناك معانا وكان بيهزر معانا. ملازم اول وقالنا انه خريج اداب وكان احتياط ودخل متخصص وقالنا نفس الكلام دا
س- لو تم قبولى . مصاريف الحربيه كام ؟
ج / مصاريف المتخصصين حربيه . 5500 جنيه
س- طب انا هيكون طبيعه شغلى ايه لما اتخرج ؟
ج/ شغال ف تخصصك لكن اوقاات تنزل تشكيلات عادى جدا زى الظباط المقاتلين . وبتترقى معاهم وبتكون ظابط عامل . وتفضل ظابط طول عمرك . ومرتبك زيك زيهم لا اكتر ولا اقل . حسب مكان خدمتك
س-طب انا سمعت ان الظباط المتخصصين آخرهم عقيد وبيخرجو . هل دا صح ؟
ج/ لا مش صح . فيه لواءات مهندسين كتير وغيرهم كتير . واللى بيخرج معاش بدرى بيبقى غلطاته كتير وملفه مش سليم . فبيطلعوه معاش ايا كان
س- هل بستلم سلاح ؟
ج/ استلام سلاح شخصى من رتبه نقيب فيما فوق . لو مكان خدمتك محتاج سلاح
س/ كونى اتحولت من ظابط احتياط لظابط متخصص . دا هيزودنى بايه فالمميزات ؟
ج/ هيزودك ان المميزات دى هتفضل تتمتع بيها طول عمرك . بالاضافه ان هيكوم ساعتها م حقك تقدم على سيارة او شقه . تبع القوات المسلحه . لان اقساطها بتسدد من مرتبك كل شهر لمدة 20 سنه وانتا كاحتياط مكنتش هتقعد الفترة دى . كان اخرك سنتين او تلاته لو جددت . بالتالى مكانش متاح ليك دا. لكن باقى المميزات زى ماهيا
Comentarios