شرح يوم سحب وتسليم الملف للمتخصصين

اولا يوم سحب الملف

الناس الى مش من القاهره وعاوزه تروح الكلية الحربية اهتركب حاجه لرمسيس ومن رمسيس هتركب عربيات موقف العاشر السلام هتنزلك قدام الكلية الحربية

ملحوظات عامة

تخفيف الشعر علي الدرجة الاولي او الثانية اهتم بمظهرك كويس عشان هتتصور هناك يمنع لبس اي احذية غير الجزمة او الكوتشي الحضور بمبلغ 100 جنيه ثمن سحب الملف احضار قلم ازرق لاي ملاحظات الحضور مبكرا من الساعة السادسة او السابعة صباحا احضار البطاقة الشخصية وشهادة التخرج او بيان النجاح

هنتكلم عن اول يوم ليك وهو سحب الملف قبل ما نخش ع الاختبارات :

السحب هيكون من بوابة التنسيق

بعد ما تدخل بيتم توجيهك سواء لسحب الملف ثم التصوير ثم الشرح ثم الخروج او حسب التريب الي هما ماشيين بيه لازم تعرفوا ان من اول خطوه ليك ف الكليه بتكون ف مسابقه بينك وبين زميلك وطبعا الافضليه للمتفوق ف الاختبارات او الواسطه لكن نصيبك محدش هياخده غيرك هتدخل وهتقضي يومك ومتقلقش هتلاقي معامله كويسه من الظباط لانهم بيتعاملوا مع ناس كبيره حاول تتجنب اي مشكله وتسمع الاوامر وتنفذها لان مخلفتك لاوامر ظابط مش هيكون ف صالحك وكل حاجه بتتحسب عليك من اول اليوم ده مش هتاخد وقت كتير وتاخد الملف وتكون ف بيتك نصيحه مني : حاول تنجز نفسك وتخلص ورقك وتقدم ف معادك واي استفسار سيبه وهيتم الرد عليه ف اقرب وقت

ثانيا يوم تسليم الملف

ايه الحاجات اللي هاخدها معايا يوم التسليم ؟ املأ الملف بالكامل وثبت صورك فى الأماكن المطلوبة ويجب أن تكون الأختام واضحة والبيانات واضحة ولو فى حاجه مطلوب منها صورة معتمدة ومش معاك يبقا خد الاصل والصورة معاك الكلية وهما هيظبطوا كل حاجه ومحدش يسألنى املا الورق الكرتون ولا لأ املا كل الملف ما عدا الحاجات اللى الكلية بتملاها بنفسها زى الورقة الصفراء وورق الطبى لما تروح تسلم الملف تاخد معاك قلم جاف ازرق وصورك اللى اتصورتها وكارت التردد وبطاقتك ودباسة عشان لو فى حاجه هتدبسها وكارت الطول والوزن و 2 اكلاسيه ومن فضلكم محدش يناقشنى ف الحاجات اللى هتاخدوها عشان صدقونى هتحتاجوها

يوم التسليم النظام ماشي ازاي ؟ الدخول بيكون من باب استاد الكلية الحربية يعني باب رقم 7 لما بتدخلوا بتتوزعوا ع مظلات حسب الطول والمجموع والشعبة يعني العسكري هيقول اللي طوله مثلا 170 و65% ييجي كدة واللي طوله اقل من 170 و60% ييجي كدا . المهم هتقعدوا ف المظلة الخاصة بالكلية و4 ظباط هيراجعوا معاك الملف ولو لقوه مظبوط ومش ناقصه حاجه بيختم عليه ختم (روجع) ولو ناقص حاجه بيقولك ارجع اعملها وتعالى . بعد كده هتروحوا على شباك خاص بالكلية وهتسلموا الملفات والراجل بيلزق رقم القيد بتاعك ف الاماكن المطلوبة فى الملف وبيلزقلك واحد ع كارت التردد وواحد تانى ع ورقة نموذج اجابة السمات بعد كدة هتروح ع شباك تانى يختملك ختم (سمات) ع كارت التردد بعدها هتقعد فى مظلة تمتحن السمات

وعن الشروط العامة للقبول

فيشترط فى جميع المتقدمين أن يكون الطالب مصرى الجنسية ومن أبوين وجدين مصريين ، وألا يكون الطالب أو أبويه مكتسبين جنسيات أخرى أو متقدم أحد منهم للحصول عى جنسية أجنبية ، وألا يكون المتقدم قد سبق الحكم عليه بعقوبة جنائية أو فى جريمة مخلة بالشرف ، وأن يكون حسن السير والسلوك ، وألا يكون قد إستقال أو فصل تأديبياً من أى كلية أو معهد عسكرى أو مدرسة عسكرية ، وأن لا يكون قد أعفى من الخدمة العسكرية لعدم اللياقة الطبية ، على أن يتم إرفاق بيان المعاملة التجنيدية ، وأن يجتاز جميع الإختبارات والفحوصات الطبية والبدنية التى يحددها مكتب تنسيق القبول وفقاً للمستويات المقررة ، وأن يجتاز إختبار قفزة الثقة فى حمام السباحة من إرتفاع (7,5) متر بدون تردد وللمرة الأولى , ولايجوز إعادة الكشف على الطالب فى نفس الدفعة المتقدم لها فى حالة عدم اللياقة الطبية ، ألا يقل الطول عن 170 سم للذكور و155 سم للإناث ويسمح للضباط الإحتياط والمكلفين وأفراد القوات المسلحة الموجودين بالخدمة بالتقدم لهذه الدفعة بنفس الشروط .

علما بأن مدة الدراسة تستمر لمدة ستة أشهر بالكلية الحربية لجميع التخصصات

اعلان

بينزل ف شهر 11 ان شاء الله

بتروح تشترى ملف ب 100 جنيه + البطاقه الرقم القومى ولازم تكون ساريه

بتقف على ميزان الطول والوزن وتاخد كارت الطول والوزن

وبعدين بتدخل اوضه تتصور وبالنسبه للبنات بتقلع الطرحه وبنت بتصورها وبعدين تلبس الطرحه وبعدين تدخل قاعه فيها لواء بيشرحلكم ازاى تملى الملف وبعدين بتاخد الصور بتاعتك وبتتوكل على الله تروح

بعدين بتبتدى تملى فالملف - بتحتاج شويه حاجات زى شهاده ميلاد فيها رقم ثلاثى موقف من تجنيد صوره بطاقه وش وظهر - فيش جنائى موجه للكليه الحربيه - كارت طولى فيه الاب والام متصورين جمب بعض واقفين واقفه عسكريه فى اى ستوديو خلفيه بيضه - شهاده التخرج - كارنيه مزاوله مهنه للاطباء والممرضين - كارنيه النقابه لو تابع لاى نقابه - صور املاك بتاعت الاب والام شقق اراضى فيلات دهب ياقوت مرجان احمدك يا رب - صوره من مؤهل الاب ومؤهل الام - بطاقة الاب والام - قيد عائلى للاب وقيد عائلى للجد ابو الاب وقيد عائلى للجد ابو الام

هشرحلكم القيد عائلى بيتعمل ازاى هو اولا بيتعمل فالسجل المدنى الى حضرتك تابع له وبتعمل بتاع ابوك ازاى ؟؟ بتصور شهادات ميلاد او صور البطايق بتاعتك انت واخواتك والاب والام وقسيمه جواز الاب والام ولو حد منهم متوفى بيتحط شهاده الوفاه وكل الورق دة بيتصور وتديله نسخه منه فالسجل المدنى وبتقوله عاوز اعمل قيد عائلى لابويا

نفس الكلام للجد ابو الاب - صور شهادات ميلاد او بطايق الاعمام والعمات و جدك وجدتك وابوك طبعا معاهم و لو حد منهم متوفى شهاده وفاته + قسيمه جواز جدك وجدتك لو لقيتها لو ملقتهاش بتطلعها من سجل المدنى لو معرفتش مش مشكله - لو جدك متجوز اتنين هتجيب قسيمه جوازه مع ست التانيه و اولادها هتجيب صور بطايقهم او شهادات ميلادهم عشان يتحطوا فالقيد برضوا

نفس الكلام للجد ابو الام صور صور شهادات ميلاد او بطايق الخلان والخلات و جدك وجدتك وامك طبعا معاهم و لو حد منهم متوفى شهاده وفاته + قسيمه جواز جدك وجدتك لو لقيتها لو ملقتهاش بتطلعها من سجل المدنى لو معرفتش مش مشكله